Haw jie daut vondoag jelest? Enn Bayern haft dee Polizei twee Dietschrusse faustjenohme, dee em Vedocht stohne, Spioone fe Russlaunt to senne. Etj we erleichtat.
Jletj jehaut, daut nich Russlauntdietsche, vleicht sogoa Plautdietsche, fe Russlaunt spioniere. Sondern Dietschrusse. En bestje lota we enn eene aundre Tieschreft oba dann doch von twee Russlauntdietsche de Red. Dee domme Journaliste, vedreihe aules.
Etj froch Chat GPT nohm Unjasched tweschen Russlauntdietsche en Dietschrusse. De sed: Russlauntdietsche send dietsche oda dietschstämmje Bewohna ut Russlaunt, dee meist aula noh Dietschlaunt utjewaundat send. Dietschrusse oba send Mensche, dee en eschta Linie auls Russe jelle, uck wan see eene besondere Beziehung to Dietschlaunt hawe, tom Biespell eenen dietschen Pauss. Chat GPT riemd en: „Von vele woat disse Betetjnung auls Beleidjung empfunge.“ Daut stemmt.
Woo lang ess maun Russlauntdietscha?
Wan maun een Russlauntdietscha oda Dietschruss ess – woolang ess maun daut? Een junga Maun ut Kanada wull miene Nicht friee. Word vetalt, daut we eena von disse Sort Mensche, ewa dee wie rede. Best du een Russlauntdietscha?, froch etj. Hee auntwod: Miene Ellere staume ut Russlaunt, etj sie oba em Sauerland jebore en oppjewosse en Kanada. Sie etj emma noch Russlauntdietscha? Woo lang ess maun Russlauntdietscha?
Na jo, docht etj, vleicht ess hee Kanadadietscha. Oda Dietschkanadja. Oder doch eeha russlauntdietscha Dietschkanodja? Dee Menniste ut Paraguay wudde sich nie auls Russlauntdietsche betetjne, obwohl see dissen Hinjagrund hawe. See seehne sich entweda aus Paraguaya oda Dietsche. Aum basten beides. Met eene Utnohm: Wan een Russlauntdietscha, dee enn Dietschlaunt oppjewosse ess, enn Paraguay ennwaundat, dan blifft hee Russlauntdietscha. Nich Paraguaya, nich Dietscha. Russlauntdietscha.
